Hamiləliyin 4-cü həftəsi

 

 • Embrionun uzunluğu həftənin əvvəlində təxminən 0,36 mm, sonunda - 1 mm-ə yaxındır.
• Həftənin sonuna yaxın körpənin başı formalaşır.
• İnsan xorionik qonadotropini hormonu hasil olunmağa başlayır.
•Aptek testləri hələ ki, insan xorionik qonadotropini hormonunun olub-olmadığın müəyyən etməyə qadir deyildirlər.

 Dölün inkişafı

Bu həftədə embriondankənar adlanan orqanların – xorion, amnion və sarı kisə inkişafı etməyə başlayır. Bunlar gələcək uşağı qida, tənəffüslə təmin etmək, kənar təsirlərdən müdafiə etmək üçün lazımdır. Embrionun özünün uzunluğu həftənin əvvəlində təxminən 0,36 mm, sonunda - 1 mm-ə qədərdir. Formaya görə o, üç embrion yarpaqlarından ibarət olan diskə bənzəyir. Daxili yarpaq (endoderma) ağciyər, qaraciyər, həzm sisteminin, mədəaltı vəzin yaradılmasına görə cavabdehdir. Orta yarpaq (mezoderma) skeletin, əzələ sisteminin, böyrəyin, qan damarlarının və ürəyin inkişafına görə cavbadehlik daşıyır. Xarici yarpaqdan (ektodermadan) gələcəkdə uşağın dərisi, tükü, gözü, diş emalı və sinir sistemi yaradılacaqdır. Bu həftənin sonuna yaxın körpənin başı formalaşır.

Ananın vəziyyəti

Əksər qadınlarda hamiləliyin ilk günlərində izah olunmayan qıcıqlanma, yüksək yorğunluq meydana gəlir, süd vəzləri şişir, gilələr həssaslaşır. Bu kimi təzahürlərə görə yumurtalıqdan yumurta hüceyrəsi çıxdıqdan sonra yumurtalıqda yaranan sarı cisim cavabdehdir. Sarı cisim gələcək anada hormonal fonu dəyişdirən progesteron hasil edir. Bundan başqa, ana orqanizmi yeni hormon – insan xorionik qonadotropini (İXH) hasil etməyə başlayır. O, orqanizmdə embrion uşaqlığın divarlarına implantasiya etdikdən sonra əvvəlcə qadının qanında, bir qədər sonra isə sidiyində yaranır.

Diqqətli olun!

Qan analizinin köməyi ilə ananın orqanizmində insan xorionik qonadotropini (İXH) olub-olmadığını hamiləliyin 10-cu günündə müəyyən etmək mümkündür. Lakin bu dövrdə hamiləliyi təsdiqləmək üçün həkimə müraciət etmək çox tezdir. Aptek testləri sidikdə İXN-in olub-olmadığını mayalanmadan yalnız 2-2,5 həftə sonra müəyyən edə bilir. Buna görə də aptek testi 4-cü həftənin sonunda iki xətti göstərməmişdirsə, bu, hələ hamiləliyin olmaması demək deyil. Testlər saxlama şəraitinə əməl edilmədikdə və ya yoxlama qatının həssaslığı zəif olduqda, səhv nəticə göstərə bilir. Yadda saxlamaq lazımdır ki, aptek testləri səhər-səhər, İXN-in sidikdə miqdarı çox olduqda, daha doğru nəticəni göstərir.

Risk amilləri

Alkoqol və siqaret gələcək ananın heç də yaxşı vərdişləri deyil. Lakin 3-4-cü həftədə bunlar dölün inkişafına təsir göstərmir, çünki döl hələ ki, öz xüsusi ehtiyatları hesabına qidalanıb inkişaf edir. Lakin hamiləlik ehtimalı varsa, spirtli içkilərdən imtina etmək lazımdır. Həmçinin rentgen müayinələrini və annotasiyasında hamiləlikdə əks göstəriş olan preparatların qəbulunu da istisna etmək lazımdır.